Skólareglur

Skólareglur

1. Samskipti í skólanum skulu byggjast á virðingu, kurteisi og tillitssemi. Nemendum ber að hlýða fyrirmælum alls starfsfólks skólans.
2. Einelti af öllu tagi, ógnandi framkoma við aðra og beiting ofbeldis er bönnuð í skólanum.
3. Nemendur eiga að mæta stundvíslega.
4. Nemendur eiga að koma undirbúnir í kennslustundir og hafa meðferðis tilskilin gögn.
5. Nemendur skulu ganga vel um skólann og sýna umhverfinu virðingu.
6. Nemendur mega hvorki hlaupa né stimpast innan veggja skólans.
7. Neysla sælgætis og gosdrykkja er bönnuð í kennslustundum.
8. Notkun síma og hljómflutningstækja er bönnuð í kennslustundum nema um annað sé samið.
9. Myndatökur eru bannaðar í skólahúsnæði Hagaskóla á skólatíma nema með sérstöku  leyfi skólastjórnar.
10. Neysla og dreifing tóbaks, áfengis og annarra vímuefna er bönnuð í skólanum, á lóð hans og á ferðalögum á hans vegum.
     

Viðurlög við brotum á skólareglum

Ef regla eitt er ekki virt skráir kennari /starfsmaður atvikið í Mentor. Meti kennari brotið þannig að víkja þurfi nemanda út úr tíma sendir hann viðkomandi til eins af stjórnendum og atvikið er skráð. Síðan er metið hvernig bregðast skuli við eftir málsatvikum hverju sinni. Forráðamaður nemenda er látinn vita.  Í öllum tilvikum skulu nemandi og kennari gera upp málið áður en nemandi fer aftur í kennslustund. Ef um alvarleg eða síendurtekin brot er að ræða geta stjórnendur ákveðið að vísa nemanda úr skóla í allt að vikutíma.

Ef um einelti er að ræða innan skólasamfélagsins skal fylgja framkvæmdaáætlun Olweusar. Þegar önnur ákvæði innan skólareglu tvö eru brotin gilda sömu viðurlög og beitt er við brotum á skólareglu eitt. Sé ofbeldi beitt skal lögregla kvödd á vettvang.

Varðandi skólareglu þrjú  skráir kennari mætingar í Mentor daglega og sendir vikulega yfirlit með tölvupósti. Umsjónarkennari lætur forráðamenn vita þegar mætingareinkunn er komin niður í sex. Ef nemandi er óeðlilega mikið frá skóla án skýringa fer málið fyrir nemendaverndarráð og  síðan áfram til Vesturgarðs. Nemanda sem er óánægður með mætingareinkunn sína og vill bæta sig er gefinn kostur á því. Skal það gert í samráði við námsráðgjafa sem vinnur málið í samvinnu við umsjónarkennara.

Ef skólaregla fjögur er ekki virt skal kennari skrá færslu þar að lútandi í Mentor. Ef um óeðlilega mikla vanrækslu er að ræða, skal umsjónarkennari hafa samband við forráðamann nemanda.

Varðandi skólareglu fimm skráir kennari í Mentor og lætur forráðamann nemanda vita ef hann telur ástæðu til.

Starfsfólki skólans ber að stoppa nemanda/nemendur af sem eru uppvísir að því að brjóta skólareglu sex. Það fer eftir eðli atvika og viðbrögðum nemanda/nemenda hver eftirleikurinn verður. Ef um alvarleg brot er að ræða sendir starfsmaður nemanda til skólastjórnanda sem getur beitt viðurlögum í samræmi við brot á skólareglu eitt.

Ef nemandi hlýðir ekki fyrirmælum varðandi  skólareglu sjö skráir  kennari atvikið í Mentor og vísar nemanda til skólastjórnanda.

Ef nemandi virðir ekki skólareglu átta  skráir kennari atvikið í Mentor.  Kennari tekur tæki og tól af nemanda og kemur þeim til skólastjórnanda. Haft er samband við forráðamann nemandans og honum gert að koma í skólann.

Ef skólaregla níu er ekki virt hefur starfsmaður leyfi til að taka myndavél eða síma af nemanda og koma  til skólastjórnanda. Haft er samband við forráðamann nemandans sem þarf að koma í skólann.

Skólaregla tíu. Ef starfsmaður skólans ber kennsl á  nemanda sem er staðinn að notkun tóbaks á skólasvæðinu skal hann láta umsjónarkennara vita sem hefur síðan samband heim. Ef um áfengis- og/eða aðra neyslu vímuefna er að ræða, skal málinu vísað til skólastjórnenda sem í samvinnu við starfsmenn Vesturgarðs taka ákvörðun um framvindu málsins. Brot geta varðað brottvikningu úr skóla í allt að fimm daga.

Ef skólareglur eru brotnar áskilja stjórnendur sér rétt til að útiloka nemendur tímabundið frá félagsstarfi sem fer fram innan skólans. Einnig geta brot valdið því að nemendum er meinuð þátttaka í ferðum á vegum skólans ( t.d. skíðaferðum).

---