Miðvikudagskvöldið 16. maí verða endurfundir eldri Hagskælinga, 45 ára og eldri (árgangar 1945-1967) haldnir í Félagsheimili Seltjarnarness. Húsið opnar klukkan 19.30 og munu tvær fyrrum skólahljómsveitir, 5 á Richter og Cogito,  leika fyrir dansi. Ræðumaður kvöldsins er Egill Helgason sjónvarpsmaður. Herlegheitin standa til kl. 02.00. Miðar eru seldir við innganginn.

Stærðfræðikeppnin BEST lauk nú í hádeginu. BEST er stærðfræðikeppni 9. bekkja af öllu landinu en það þessu sinni tóku um 100 bekkir þátt. Sigurvegari keppninnar í ár er 9.TMG í Hagaskóla en í júní mun bekkurinn keppa við sigurvegara keppninnar frá hinum norðurlöndunum. Sú keppni fer fram í Stokkhólmi dagana 2. - 6. júní. Þetta er þriðja árið í röð sem nemendur Hagaskóla vinna keppnina og keppa fyrir Íslands hönd í Norðurlandakeppninni.

Lið Hagaskóla í Skólahreysti hafnaði í 3. sæti í úrslitum sem fram fóru í Laugardalshöll í gærkvöldi. Lið Holtaskóla sigraði og Heiðarskóli varð í öðru sæti. Lið Hagaskóla skipa Tryggvi Már Magnússon, Benjamín Þorlákur Eiríksson, Leifur Þorbjarnarson, Edda Hulda Ólafardóttir, Diana Sumskyte og Guðrún Sólveig Sigríðardóttir. Keppendur Hagaskóla stóðu sig með miklum sóma og það var ekki síst jafnri frammistöðu að þakka að 3. sætið var þeirra. Leifur sigraði í upphífingum (46 stykki) og Díana varð 2. í armbeygjum (58 stykki). Edda og Benjamín Þorlákur urðu svo í 5. sæti í hraðaþrautinni á 2 mín. 21,95 sek.

Úrslitin í Spurningakeppni grunnskólanna fóru fram á Markúsartorgi í beinni útsendingu á RÚV í gær miðvikudag. Þar áttust við lið Hagaskóla og grunnskóla Dalvíkur.Úrslitin urðu þau að Hagaskóli bar sigur úr býtum með 28 stigum gegn 17. Spurningakeppni grunnskólanna hefur vaxið mikið undanfarið en að þessu sinni tóku 60 grunnskólar þátt í keppninni en eins og jafnan stendur aðeins einn uppi sem sigurvegari að keppni lokinni.

Nemendur í Hagaskóla sýndu samfélagsábyrgð í morgun og tíndu upp rusl í næsta nágrenni skólans. Þau tóku þar með áskorun borgarstarfsmanna um að hver og einn legði sitt af mörkum til að hreinsa borgina eftir veturinn. Krakkarnir fóru um Vesturbæ í flokkum vopnuð latex-hönskum og plastpokum og fylltu hvern pokann af öðrum af kaffimálum, sígarettupökkum, stubbum og flugeldarusli. Af nógu var að taka við helstu umferðargöturnar og í runnum. Eftir þetta litla góðverk var börnunum boðið upp á grillaðar pyslur og notuðu mörg þeirra tækifærið og léku sér í blíðunni þar til að kennsla hófst aftur. Gott morgunverk sem vonandi skapar umræður um góða umgengni og skyldur okkar við samfélagið.  Sjá myndir hér.

Síðasti kennsludagur fyrir páskaleyfi er í dag, föstudaginn 30. mars. Kennsla hefst aftur miðvikudaginn 11. apríl. 

Verðlaunaafhending í keppni grunnskólanemenda í stærðfræði fór fram á  Hátíðasal Menntaskólans í Reykjavík sunnudaginn 25. mars. Hún var afar vel sótt en rúmlega 130 gestir mættu. Kór Menntaskólans í Reykjavík undir stjórn Guðlaugs Viktorssonar sá um tónlistarflutning. Rektor bauð gesti velkomna og sagði lítið eitt frá sögu skólans og skólastarfinu. Stærðfræðikeppni fyrir grunnskólanemendur er nú haldin í ellefta skipti í Menntaskólanum í Reykjavík og að þessu sinni tóku þátt nemendur úr Austurbæjarskóla, Álftamýrarskóla, Árbæjarskóla, Breiðholtsskóla, Foldaskóla, Hagaskóla, Háteigsskóla, Hlíðaskóla, Húsaskóla, Kársnesskóla, Landakotsskóla, Valhúsaskóla, Vesturbæjarskóla og Vogaskóla. Stærðfræðikeppnin var haldin þriðjudaginn 13. mars í þremur stigum, keppni fyrir 8. bekk, 9. bekk og 10. bekk og 286 nemendur tóku þátt í keppninni. Nemendur í 10 efstu sætunum á hverju stigi fengu viðurkenningarskjal frá skólanum og þrír efstu á hverju stigi fengu peningaverðlaun frá Arionbanka.

Nemendur í Hagaskóla söfnuðu rúmlega 1,8 milljónum króna á góðgerðardeginum Gott mál í Hagaskóla sem haldinn var 7. mars síðastliðinn. Nemendur ákváðu að styrkja Styrktarfélag krabbameinssjúkra barna og SPES barnahjálp. Afrakstur söfnunarinnar var afhentur við athöfn í Hagaskóla í dag þar sem Páll Óskar steig meðal annars á svið. Upphæðinni var skipt jafnt á milli SKB og SPES.

Hér eru nokkrar myndir frá góðgerðardeginum okkar, Gott mál, sem fram fór 7. mars. 

Nemendur Hagaskóla hafa frá í janúar verið að skipuleggja árlegan góðgerðardag sem gendur undir nafninu Gott Mál – unglingar fyrir unglinga.  Þetta er þriðja árið sem góðgerðardagurinn er haldinn. Mikil vinna og fræðsla liggur á bakvið þennan dag sem í ár verður miðvikudaginn 7. mars.  Þá verður opið hús í Hagaskóla milli klukkan 16-19 og allir bekkir standa fyrir fjáröflun af einhverju tagi.  Meðal þess sem í boði verður er draugahús, andlitsmálning, happdrætti, veitingastaðir, þrautir og uppstand Ara Eldjárn. Ásamt því  sýna nemendur ýmis skemmtiatriði á sviði og á göngum skólans. Þrjú kaffihús verða staðsett á mismunandi stöðum í skólanum þar sem gestir geta sest niður og notið veitinga.

Lið Hagaskóla tryggði sér á öruggan hátt sæti í úrslitum Skólahreystis í undankeppni 3. riðils miðvikudaginn 1. mars. Lið Hagaskóla náði 41 stigi en í 3. riðli kepptu lið frá skólum í Vesturbæ, Austurbæ og Seltjarnarnesi. Lið Hagaskóla mun því keppa til úrslita ásamt sigurvegurum hinna 8 riðlanna fimmtudaginn 26. apríl í Laugardalshöll. Sýnt verður beint frá úrslitunum á RÚV.

Lið Hagaskóla keppir í 3. riðli í skólahreysti fimmtudaginn 1. mars kl. 19:00-20:20. Keppnin fer fram í Smáranum í Kópavogi. Stuðningsmenn fara með rútum frá Hagaskóla kl. 18:15 og koma aftur til baka fyrir kl. 21:00. Athugið að aðeins þeir sem hafa skráð sig komast með í rútum stuðningsmanna.

Miðvikudaginn 29. febrúar kl. 20:00 verður fræðslukvöld í Hagaskóla fyrir foreldra um skaðsemi kannabis. Erindi flytja Andrés Magnússon geðlæknir og Karl Steinar Valsson aðstoðaryfirlögregluþjónn. Auk þeirra mun Ásta Lára Jónsdóttir verkefnastjóri Frostaskjóls og María Helena Sarabia foreldri ræða hlutverk félagsmiðstöðvar og foreldra.

Í nóvember 2011 var hin árlega Olweuskönnun lögð fyrir nemendur Hagaskóla. Við erum stolt af því að tilkynna að árangur skólans var frábær þetta árið. Einelti hefur dregist verulega saman á milli og ára og hefur aldrei mælst minna.

Nú hafa einkunnir haustannar verið aðgengilegar í Mentor í tvær vikur. Foreldrar og nemendur eru hvattir til þess að kynna sér þær. Það er gert með því að skrá sig inn í Mentor og velja svo flipann „Einkunnir“ þegar komið er í nemendaspjaldið. Þar sjást allar einkunnir annarinnar. Ef nemendur eða foreldrar rekast á augljósar villur eru þeir beðnir um að hafa samband við skólann. Nánari sundurliðun þessara einkunna er svo að finna inni í verkefnabókum nemenda sem eru aðgengilegagr í Mentor. Meðaltöl prófs- og vinnueinkunna í öllum árgöngum eru birt á vef Hagaskóla. 

Fimmtudaginn 16. febrúar munu Valhýsingar og Hagskælingar skemmta sér saman og keppa í hinum ýmsu keppnisgreinum. Segja má að um hefð sé að ræða sem rekja má aftur til ársins 2009 þegar vináttudagur þessara skóla var fyrst haldinn. Unglingarnir skipulögðu viðburðinn í samvinnu við starfsfólk félagsmiðstöðva sinna og eiga mikið hrós skilið.

Háskólinn í Reykjavík hefur boðið nemendum í 9. bekk í Hagaskóla uppá spennandi verkefni með það að markmiði að gefa krökkunum nýja sýn á heim tækninnar og vekja forvitni þeirra á tækni- og raungreinum. Fyrir áramót var nemendum í 10. bekk boðið upp á sams konar dagskrá sem þótti takast það vel að ákveðið var að bjóða nemendum í 9. bekk einnig. Lögð er áhersla á að sýna þeim leiðir til að nýta tæknina til að skapa, leysa verkefni og öðlast frekari skilning á ólíkum viðfangsefninu. Kennarar úr tækni- og verkfræðideild og tölvunarfræðideild HR taka þátt í verkefninu af hálfu HR. Allir 9. bekkir í Hagaskóla fara í þrjár heimsóknir í HR næstu þrjár vikurnar á þriðjudögum eða miðvikudögum fyrir hádegi. Viðfangsefnin verða meðal annars: Græjuverkfræði (megatróniks), leikjafræði, segulsvið og rafmótorar og hvernig virka leitarvélar?

Sveitarfélög höfuðborgarsvæðisins hafa unnið stöðugt að því að efla samgöngur á höfuðborgarsvæðinu. Um tíma hefur Strætó boðið námsmönnum á framhaldsskóla- og háskólastigi kaup á svokölluðu Nemakorti við góðar undirtektir. Því er það okkur sönn ánægja að segja frá því að nemakortið verði einnig í boði fyrir nemendur á grunnskólastigi.

Viltu læra í notalegu umhverfi og gætir þú ef til vill þegið smáaðstoð við heimanámið?

Í Borgarbókasafni er boðið upp á:
- aðstoð við heimanám í notalegu umhverfi
- stuðning við áframhaldandi nám
- tækifæri til að styrkja sjálfsmyndina
- úrval bóka, kvikmynda, tímarita og tónlistar
- skemmtilegan félagsskap í skapandi umhverfi

Sjúkrapróf verða haldin á morgun, föstudaginn 20. janúar. Nemendur sem eiga eftir að taka próf þurfa að gefa sig fram við greinakennara sína. 10. bekkur tekur próf í stofu 26, 9. bekkur í stofu 7 og 8. bekkur í stofu 43.

Árleg framhaldsskólakynning fyrir nemendur í 10. bekk og foreldra/forráðamenn þeirra verður haldin í Valhúsaskóla á Seltjarnarnesi þriðjudaginn 24. janúar næstkomandi kl. 17 - 18:30. Þetta er samsstarfsverkefni Hagaskóla og Valhúsaskóla. Fulltrúar framhaldsskólanna verða á staðnum til að kynna skóla sína og svara spurningum.

Þriðjudagurinn 20. desember var síðasti kennsludagur fyrir jól. Þessi dagur var að venju óhefðbundinn aðventudagur þar sem nemendur fengu að njóta upplestrar og tónlistar á sal. Margrét Örnólfsdóttir kom og las uppúr bók sinni auk þess sem Laylow spilaði fyrir nemendur og söng. Aðventustundin var mjög skemmtileg og notaleg. Starfsfólk Hagaskóla sendir nemendum og fjölskyldum þeirra hlýjar jóla- og áramótakveðjur með von um að allir njóti hátíðanna.

Nú eru allar niðurstöður samræmdra prófa komin í hús frá Námsmatsstofnun sem og lausnir nemenda sem umsjónarkennarar sjá um að koma til nemenda sinna. Árangur nemenda Hagaskóla var mjög góður sama við hvað er miðað. Meðaleinkunnir eru í öllum tilvikum fyrir ofan lands- og Reykjavíkurmeðaltöl. Hagaskóli er í öllum tilvikum í hópi fimm efstu skóla í Reykjavík. Sjá myndrit með niðurstöðunum.

Hagaskóli varð formlegur þátttakandi í verkefninu Heilsueflandi grunnskóli í janúar 2011. Síðan þá hefur verið unnin undirbúningsvinna fyrir verkefnið en það var opinberlega sett af stað í dag, föstudaginn 25. nóvember á Grænum degi í Hagaskóla. Verkefnið, sem er í umsjón Lýðheilsustöðvar, miðar að því að efla vitund og áhuga  nemenda og starfsfólks skólans á heilsueflingu þar sem áhersla er á samstarf við foreldra og nærsamfélag. Hugmyndafræði heilsueflandi skóla byggir á vísindalegum gögnum þar sem sýnt hefur verið fram á að skólinn getur bætt heilsu og líðan nemenda sem hefur jákvæð áhrif á námsárangur.

Föstudagurinn 25. nóvember verður grænn dagur í Hagaskóla. Dagurinn markar upphaf verkefnisins Heilsueflandi grunnskóli þar sem áhersla er á næringu og hollustu þetta skólaár. Nemendur í 10. bekk bjóða uppá grænt grænmetis smoothie. Nemendur og starfsmenn eru hvattir til að mæta í grænu og vera græn að innan og utan.

Þemadagurinn hófst á vinabekkjasamveru en þá tóku eldri nemendur á móti vinabekk úr yngri árgangi. Vinabekkirnir fóru í fjölbreytta leiki með það að markmiði að hrista hópinn saman. Að lokinni vinabekkjasamveru tók við þemavinna dagsins en þá unnu nemendur í hópum blönduðum úr öllum árgöngum. Hverjum hóp var stjórnað af tveimur nemendum úr 10.bekk sem stóðu sig afskaplega vel.

Síðastliðið sumar samþykkti borgarstjórn Reykjavíkur að sameina menntasvið, leikskólasvið og tómstundaskrifstofu íþrótta- og tómstundasviðs í nýtt svið sem fékk nafnið skóla- og frístundasvið. Undir sviðið heyra allir borgarreknu grunn- og leikskólar í Vesturbæ sem og félags- og frístundamiðstöðin Frostaskjól. Nú stendur yfir stefnumótun fyrir sviðið sem miðar að því að efla samstarf og flæði þekkingar milli allra stofnanna til að tryggja sem besta þjónustu þess.

Í tilefni af degi íslenskrar tungu fóru nokkrir 10. bekkir í heimsókn á leikskóla í hverfinu og sögðu börnunum þar sögur sem þau hafa samið í íslenskutímum undanfarið.

Laugardaginn 12.nóvember milli 12:00-16:00 mun Starfsmannafélag Hagaskóla standa fyrir markaði í sal Hagaskóla. Fjölbreyttur varningur verður til sölu þ.á.m. fatnaður, skór, bækur, friðarkerti, handverk og hönnun. Einnig geta gestir keypt sér kaffi og vöfflur.